Thoob Yej & Ntxawm Qaum Ntuj

As a kid, I enjoyed listening to the elders weave Hmong folklore into life.  My grandmothers used to tell me stories at night to help me fall asleep, and it's a pity I always fall asleep before the ending.  But, one of my favorites is the story about the girl being a heavenly bird who was caught by a talented mortal so she eventually wed him.  But fate had it that she was forced to leave him, and the remaining story talks about his journey to the land beyond the sky to retrieve her back (it's similar to the one below, but not 100% accurate because every storyteller adds their own flavor to the original story).

Some of you may recall that this story is very similar to the Tai/Dai story, "The Peacock Princess."  However, I can assure you that it's not a copy.  Hmong ancestors lived in China as well and I believed that our ancestors observed nature like other Chinese ethnic groups too (or they may have influenced one another) to come up with such similar legend.  China does possess mountains carved like angry elephants, boiling hot springs and lush forests, and Lake Poyang (the Hmong/Miao ancestors used to live there) is a refuge for birds that fly to it for the winter from as far away as Northern Siberia (that's why in the folktale the protagonist is always told that if he takes the heavenly road--meaning he fly, he'll get to the girl's kingdom quickly but if he takes the earth road--or walk, it'll be on the year scale).   Watch BBC's Wild China, and you'll know.

*Disclaimer* This blog takes no credit for the content of the story.  The story belongs to Patrimoine Culturel Hmong, and the original storyteller is Yaj Vam Tuam.

(Note: Again, the story is in Hmong.  There may be grammatical errors.  I will slowly fix them as time affords me so.)

 

Puag thaum ub ov, muaj ib pab niag qaib qus coob coob xij tuaj da dej hauv lub niag pas hawv lauj!

Thoob Yej mus plob pom.  Nws los txog tsev ov.  Nws los xav xav.  Ab!  Sim mus cuab hlua kais rau saib.  Thoob Yej txawm los ua tau rau rooj hlua kais, nws coj mus cuab tas nrho ncig lub niag pas hawv ntawd.

Ces Thoob Yej los tau ib hnub.  Hnub tom qab, Thoob Yej txawm mus xyuas.  Ciav mag tau ib tug qaib qus zoo zoo nkauj li lauj!

Ces Thoob Yej txawm mus daws tau tus qaib qus los.  Ua ciav, tsis yog qaib qus lawm las.  yog ib tug hluas nkauj zoo zoo nkauj li lauj!  Tus hluas nkauj muab tis tw hle tas, ces yog ib tug hluas nkauj zoo zoo nkauj lawm tiag.  Thoob Yej txawm hais rau tus hluas nkauj tias, "Ab!  Leej muad, koj yuav txia ua ib tug hluas nkauj zoo ua luaj tuaj da lub niag pas hawv no ua tus dab tsi?"

Tus hluas nkauj txawm teb tias, "Aub!  Leej yawm dab lauj!  Ntshai yuav yog kuv no ntuj yeej tiam los ua koj poj niam ho!  Vim tias peb tuaj coob ua luaj, luag ho tsis mag koj rooj hlua kais.  Kuv twb ho tsis pom es kuv yuav los mag koj rooj hlua kais.  Leej yawm dab, peb mas tuaj qaum ntuj tuaj ov.  Koj mas koj hais tias lub no yog pas hawv no, tiam sis tsis yog.  Yog dej yog cawv ov.  Es peb niaj hnub tuaj haus dej haus cawv.  Haus pov khawv lawm peb mam ho ya rov qab mus rau saum qaum ntuj."

Ces Thoob Yej thiaj hais tias, "Aub!  Yog li mas, leej muam lauj, koj ho tuaj mag kuv rooj hlua lawm thiab, ces koj los ua kuv niam yau.  Tso cia niam hlob ua niam hlob yuad?"

Tus hluas nkauj teb hais tias, "Ua li tiag, Thoob Yej.  Vim Ntuj yeej tiam kuv los rau koj, kuv thiaj los mag koj rooj hlua, ces cia kuv ua koj niam yau nawd."

Ces Thoob Yej thiaj li coj tus hluas nkauj los ua nws niam yau.

Thoob Yej thiaj los hais rau luag zej luag zos.  Ces tas sawv daws thiaj li mus ce lub niag pas hawv ntawd coj los ua poov xab ua cawv. 

Txij thaum ntawd los rau txheej nyiam no, sawv daws thiaj tau poov xab poov cawv coj los ua dej ua cawv haus.

Thoob Yej los nyob nyob ces teb chaws txawm ua tsov ua rog lauj!  Huab Tais txawm tseev kom Thoob Yej mus ntaus rog xwb.  Thoob Yej txawm hais tias, "Aub!  Kuv nyuam qhuav yuav tau niam yau los, mas kuv tseem niaj hnub npaj dej cawv, tso kuv yuav mus haus dej haus caw."

Huab Tais txawm teb tias, "Tsis txhob hais li kod.  Nyiam no teb chaws ua tsov ua rog lawm, mas koj no raug mus tua rog.  Koj raug mus ua ib tug thawj coj, mas koj yuav tsum mus.  Kev haus dej haus cawv thaum twg kuj tau.  Qhov ntawd tsis kub npaum li kev ntaus tsov ntaus rog nawd."

Ces Huab Tais txawm tsis tseev li lauj!  Thoob Yej txawm raug mus tau rog lawm lauj.  Thoob Yej yuav mus ov.  Nws txawm hle hlo nws ob ntiv nplhaib kub los ntxig rau ntawm nws niam yau ob tug ntiv tes ntag.  Thob Yej hais tias, "Niam yau!  Kuv muab ob nti nplhaib no rau koj.  Mas kuv mus ntaus rog lawm ov.  Luag txawm hais tias kuv tuag lawd, los tsuav yog kuv ob nti nplhaib no tsishle hlo ntawm koj ntiv tes, mas koj tsis txhob ntseeg laug nawd!  yog thaum twg kuv siav tu nrho lawm, mas ob nti nplhaib yeej hle hlo ntawm koj ob tug ntiv tes ntag ov, mas thiaj yog kuv tuag lawm nawd."

Ces Thoob Yej yuav mus.  Nws txawm muab niam yau cov tis tw zais rau puag hauv qab txhab nplej lauj!  Ib niag txhab nplej puv nkaus rau saud lawm, muab cov tis tw rau hauv qab kiag.

Thoob Yej mus tua rog tau peb xyoos tsis los li lauj.  Thoob Yej txiv yawg laus txawm niaj hnub ntaus txheeb, niaj hnub ua tsawv saib Thoob Yeej mus nyob li cas lawm.  Niaj hnub niaj hnub ntaus txheeb.  Thoob yej txiv txawm vwm lawm lauj.  Yawg laus niaj hnub saib nws txawm hais tias, "Aub!  Yuav tau muab niam Thooj Yej yau tua los txi dab teb dab chaw, mas Thoob Yej thiaj li yuav yeej tsov yeej rog.  Yog tsis muab nyab yau los tua txi dab teb chaws mas, Thoob Yej yeej yuav tsis yeej tsov rog li lauj."

Thaum Thoob Yej yuav mus ua rog nws muab niam yau cov tis tw zais rau hauv qab txhab nplej lawm lauj.  Mas tshuav peb hnub xwb, niag yawg yuav muab nyab yau coj los txi dab teb chaws tso, Thoob Yej thiaj li yuav yeej tsov rog no lauj.

Niam hlob los hlub niam yau hwv thiab.  Ces ob niam hlob niam yau txawm mus nrhiav tawv, nrhiav lev los pua.  Ob tug txawm muab txhab niag nplej daus daus puv tsev nkaus, thiaj li daus txog hauv qab txhab.  Na has niam yau cov tis tw nyob hauv, thiaj li muab rau niam yau.  Ces niam yau txawm seev tias, "Ab!  Thaum Thoob Yej yuav mus, nws twb hais rau kuv tias, yog thaum twg ob nti nplhaib tsis tau hle hlo ntawm kuv tus ntiv tes mas nws yeej tseem muaj txoj sia nyob xwb.  yog hle lawm mas nws thiaj yuav tsis muaj txoj siab nyob.  Ob nti nplhaib kub tsis tau hle, mas cuaj xyoos kaum xyoo los yeej tsis ntshai kiag no.  Ua li cas nyem no txiv xij niaj hnub ntaus txheeb ntaus kuam, tso yuav muab kuv los tua txi dab teb dab chaw, kom Thoob Yej thiaj li yeej tsov yeej rog.  Tab sis niam hlob wb muab tau kuv cov tis tw lawm.  Kuv yuav rov qab mus kuv niam kuv txiv lawv.  Yog kuv muab ob nti nplhaib no rau niam hlob cia mas Thoob Yej los txog nws yuav tsis zoo siab.  Ces cia kuv muab coj mus faus rau pem niag pob ntsaum, pem hauv zos ped."

Thoob Yej niam yau txawm coj ob nti nplhaib kub mus faus rau pem niag pob ntsaum.  Nws hais rau niag pob ntsaum hais tias, "Tshuav peb hnub xwb, txiv yawg yuav muab kuv tua txi dab teb dab chaw, Thoob Yej thiaj yuav yeej tsov yeej rog no.  Nyiam no kuv niam hlob wb daus tas txhab niag nplej, muab tau kuv tej tis tw lawm, ces kuv yuav rov mus kuv niam kuv txiv lawv puag saum qaum ntuj.  Kuv muab Thoob Yej ob nti nplhaib kub no faus tseg rau koj.  Yog Thoob Yej los no ces koj muab rau nws.  Koj hais rau nws tias, kom nws tsis thxob nco kuv no.  Thiab kom nws tsis txhob lawv kuv qab tuaj.  Deb deb li, nws yeej yuav tuaj tsis txog kuv li no ov!  Nyiam no kuv mas kuv mus qaum ntuj mus hos nws tuaj mas nws kawg yuav tuaj ntiaj teb tuaj xwb.  Nws yeej yuav tuaj tsis txog ib zaug li.  Kom nws ua ib siab zov nws niam hlob xwb no ov!"

Niam yau mus hais rau niag pob ntsaum tas.  Nws txawm rov los muab tej tis tej tw coj los rhais rau tej caj npab, tej caj hlaub tas.  Ces nws txawm tuaj ib niag cev plaub lawm xwb lauj.  Niam yau txawm ya tshoom ntuj vos dua qaum ntuj lawm.  Ces niam yau ya lawm tau peb hnub.

Thoob Yej los txog ntua, Thoob Yej nug tias, "Niam hlob, ua li niam yau ne?"

Niam hlob teb tias, "Niam yau, ces nws ya rov qab mus nws niam thiab nws tixv puag saum qaum ntuj lawm.  Nws twb mus tau peb hnub lawm."

Thoob Yej hais tias, "Ua lic as nws ya lawm?  Thaum kuv yuav mus kuv twb hais rau koj hais tias kom koj nyob koj hlub nws no ne!  Nyiam no kuv niam yau mus lawm, es kuv yuav ua li cas ua neeg no?"

Niam hlob txawm teb tias, "Kuv yeej hlub nws kawg los mas.  Tiam sis yog koj txiv nev!  Nws niaj hnub ntaus txheeb, niaj hnub khom kuam.  Es nws hais tias, yuav muab niam yau los tua txi dab teb dab chaw, koj thiaj yuav yeej tsov yeej rog.  yog tsis muaj niam yau los tua txi dab teb dab chaw mas koj yeej yuav tsis yeej tsov yeej rog no.  Ces niam yau ntshai.  nws thiaj khiav mus rau qaum ntuj lawm ntag!  Yog tias koj xav paub mas koj mus nug pem niag poj ntuam pem hauv zos ped naj!  Thaum koj niam yau yuav mus, mas nws yeej hais txhij hais txhua rau niag pob ntsaum peb lawm.  nws hais tias yog koj los no ces kom kuv hais rau koj mus nug niag pob ntsaum ped nws mam hais rau koj no."

Ces Thoob Yej quaj quaj.  Nws thiaj mus txog pem hauv zos.  nws nug niag pob ntsaum.  Niag pob ntsaum thiaj hais tias, "Thoob Yej, thaum koj niam yau yuav sawv kev mus, nws hais tias nws muab koj ob ntiv nplhaib kuv rau kuv cia.  Thaum koj yuav mus mas koj hais rau nws tias yog thaum twg koj ob ntiv nlphaib kub hle hlo ntawm nws ob tug ntiv tes lawm mas koj thiaj li tsis muaj txoj sia nyob lawm.  yog hais tias koj ob ntiv nplhaib kub ntawm nws ntiv tes tsis hle mas kom nws yeej meem nyob tos.  Cuaj xyoos kaum xyoo los koj yeej tseem nyob li qub.  Nyiam no nws twb ua ib siab nyob lawm.  Tab sis vim koj txiv.  Koj txiv niaj hnub ntaus txheeb, niaj hnub khom kuam.  Ces yuav muab koj nyab yau los tua txi dab teb dab chaw tso koj thiaj li yeej tsov yeej rog no.  Koj nyab yau thiaj li ya rov mus dua qaum ntuj lawm.  mas nws hais rau kuv tias yog koj los no ces kom kuv hais rau koj tias kom koj tsis txhob lawv nws qab mus kiag li.  nws mas nws mus qaum ntuj mus.  yog tias koj lawv nws qab mas koj yuav mus ntiaj teb mus xwb, koj yeej yuav mus tsis txog ib zaug li.  Koj kav tsij ua ib siab nrog koj niam hlob nyob xwb no nawd!  Hos koj ob ntiv nlplhaib kub nyob no, kuv mam muab rau koj."

Ces pob ntsaum muab tau ob ntiv nplhaib kuv rau Thoob Yej, ces Thoob Yej quaj quaj nws thias tias, "Aub!  Kuv mas yeej yuav lawv kuv niam yau qab mus xwb li.  Yog kuv tsis tau kuv niam yau mas kuv yeej tsis ua neeg li."

Ua li cas los Thoob Yej yuav mus raws nws niam yau qab xwb xwb lauj.  Niag pob ntsaum ua tsis tau tes, nws thiaj nug tias, "Ua li, koj yuav mus tiag tiag los, Thoob Yej?"

Thoob Yej teb hais tias, "Aub!  Kuv yuav mus tiag tiag li nawd!  Kuv yeej tsis nyob li."

Niam pob ntsaum thiaj hais tias, "Yog koj yuav mus xwb no ce skuv tsi smuaj dab tsi rau koj, ces kuv muab ob lub niag tixv lws zoov no rau koj xwb.  Koj nqa mus raws koj niam yau qab, mas koj niam yau mus qaum ntuj lawm, koj yuav mus ntiaj teb.  Yog koj mus mus muaj ob lub niag hauv roob nyo ntshis los thaiv koj kev lawm no ces koj muab ib lub txiv lws zoov no los pov rhees rau hauv nruab nrab, ces ib lub nyo ntshis rov tod, hos ib lub nyo ntshis rau tod lawm thiab.  Ces koj thiaj tau kev mus nawd."

Niag pob ntsaum txawm muab tau ob lub niag txiv lws zoov rau Thoob Yej kom Thoob Yej nqa mus xwb xwb no.

Ces Thoob Yej txawm sawv kev mus lawm lauj!  Mus mus txog puag ib nta ntuj ov, txawm muaj kiag ob lub niag hauv roob nyo ntshis los thaiv Thoob Yej kev lawm tiag lauj!  Ces Thoob Yej saib qhov twg los tsis tau kev.  Mus qhov twg los tsis tau kev lawm tiag lauj!  Thoob Yej thiaj li muab kiag ib lub niag txiv lws zoov los pov rhees rau hauv nruab nrab ob lub niag roob.  Ob lub niag roob thiaj tu nrho nruab nrab, nyiam lem nyias lawm thiab.  Thoob Yej ho mus txog ntua rau ob lub niag pob tsuas, mas niam nyo ntshis los thaiv nkaus kev.  Ho tu nrho rov lawm.  Rov nyo zoj los thaiv nkaus kev dua.  Pheej ua li ntawd.  Ces Thoob Yej tsis tau kev mus thiab lauj.  Thoob Yej thiaj li muab kiag ib lub txiv lws zoov pov kiag rau nruab nrab.  Ob lub niag tsua thiaj tu nrho, ib lub nyo ntshis rau ib qho lawm.  Thoob Yej thiaj li tau kev mus ntxi vlawm thiab.  Nws ho mus mus ces mus txog rau ncauj zag tsov lo lauj!  Zaj rua ncauj u, dhos daws dhos daws txoj kev tsis tau kev mus li thiab lauj!  Thoob Yej quaj quaj.  Nws thiaj li muab kiag ib lub txiv lws zoov ntsaws kiag rau hauv ncauj zag tsov lo.  Cas nyias fee nyias tag lawm, ho tau kev mus lawm thiab lauj!  nws mus mus, txawm mus txog rau ib tug dej kub kub li thiab lauj!  Tsuas tias cev pas rau hauv mas pas tu nrho, cev khaub hlab rau hauv mas khaub hlab tu nrho thiab xwb lauj.

Ces Thoob Yej quaj rau ped quaj rau nrad tsis tau kev mus lawm lauj!  Txoj kev los tws rau ntawd lawm.  Thoob Yej quaj quaj.  Cas txawm los zoj ob tug tib neeg.  Nkawd los nug tias, "Koj yuav mus dab tsi, tus npawg?"

Thoob Yej teb hais tias, "Aub!  Kuv mas yog kuv niam yau nws tuaj mus dua qaum ntuj lawm.  Kuv yuav tuaj mus raws nws no naj, ob tug npawg.  Ua li neb yuav los mus lawm qhov wg thiab, ob tug npawg?"

Ob tug npawg ntawd txawm teb tias, "Aub!  Wb mas yog los ntiaj teb los.  Wb kuj yuav los lawm qaum ntuj thiab.  Tiam sis wb mas wb yuav mus taus, vim wb hle wb lub tsho cia lawm.  Hos koj mas koj yuav mus tsis taus, vim koj tsis tau hle koj lub tsho cia rau ntiaj teb nav.  Yog ua li cas los koj yuav mus xwb no, mas cia wb ib tug mus sab ped ib tug mus sad nrad, tso koj mus nruab nrab, mas koj thiaj yuav mus taus.  Tsis ua li ntawd koj mus tsis taus nawd."

Ob tug ntawd mas yog dab tuag xwb.

Nkawd txawm mus sab ped thiab sab nrad, Thoob Yej txawm mus nruab nrab.  Ciav dej tsis kub li, dej txias txias xwb.  Lawv mus dhau tus dej ntawd rau tid ces muaj ob txog kev lawm lauj!  ob tug dab tuag ntawd txawm hais tias, "Txog qhov no mas kev ncaim lawm nawd!  Koj tseem tsis tau hle koj lub tsho.  Koj yuav mus qaum ntuj, mas koj yuav nce lub niag roob no lawm peb, ces koj yuav mus txog rau qaum ntuj.  Hos wb mas wb yuav mus txog niag tav zas no lawm nrab.  Wb yuav mus lawm nram nroog nawd."

Ces Thoob Yej tsoo tsoo hav zoov mus, tsis muaj tus dab tsi syuav los pab li lauj!  kev los tsis muaj kev.  Niag hav zoov nuj xiab xwb lauj.  Thoob Yej txawm quaj quaj.  Thoob Yej mus mus, txawm muaj ib tug mos ntsuab hais tias, "Les les, yog koj pub hmoov rau kuv noj no, kuv coj koj kev."

Thoob Yej hais tias, "Aub!  Yog koj coj kev kev no, kuv pub tiag."

Ces Thoob Yej txawm muab tau ib nyuag qhov mov rau mos ntsuab noj tag.  Mos ntsuab txawm ya les les ua ntej, Thoob Yej txawm lawv mos ntsuab qab lauj.  Mos ntsuab mus qhov twg Thoob Yej mus qhov twg.  Pheej mus pheej mus ces nkawd mus mus tsuas ntuj lauj.  Niag mos ntsuab txawm hais tias, "Thoob Yej, wb yuav mus pw lawm pem niag hauv paus ntoo ped.  Mas ib ntsi shnub ncoo hauv roob tsis muaj tshav ntuj lawm, yuav muaj peb tug niag noog roov ya los pw saum niag ntoo saud.  Cov niag noog roov yuav los sib tham nyob saud."

Ces Thoob Yej nkawd txawm mus pw pem niag hauv paus ntoo lauj.  ib me ntsis zoj xwb, txawm mauj peb tug niag noog roov loj loj ya los pw saud tiag liaj.  Cov niag noog roov txawm sib tham zom zaws.  Muaj ib tug txawm hais tias, "Aub!  Ua li tag kis peb yuav mus ntxov los mus lig ne yuad?"

Muaj ib tug txawm teb hais tias, "peb mas yuav mus ntxov nawd.  Thaum ub, nyob qaum ntuj no, muaj ib tug ntxhais tuaj mus haus dej haus cawv rau ntiaj teb.  Mua ib tug Hmoob hu ua Thoob Yej no, nws txawm tuaj cuab hlua mag tau tus ntxhais ntawd.  Thoob Yej txawm coj mus ua niam yau.  Ces tsis ntev Thoob Yej txawm mus ua rog lawm.  Niag yawg uas yog lawv txiv txawm yuav muab tus ntxhais ntawd tua txi dab teb dab chaw es Thoob Yej thiaj yuav yeej tsov yeej rog no.  mas tus ntxhais ntxhai, nws thiaj khiav los rau pem nws niam thiab nws tixv nyob saum qaum ntuj no lawm.  mas nyiam no twb muaj ib tug vauv thiab twb yuav yuav.  Tag kis lawv yuav tua nyuj tua twm haus tshoob.  Tag kis peb yuav tau mus ntxov ntoxv xyov kaj ntug txoog peb puas tseem yuav txog los tsis txog thiab.  Mas peb yuav tsum mus ntxov ntxov peb thiaj yuav tau hnyuv nyuj hnyuv twm noj laiv."

Cov niag noog roov los tham li ntawd tas.  Ce sniag mos ntsuab txawm los hais rau Thoob Yej hais tias, "Aub!  Zaum no mas kuv coj koj wb maj mwm nce tus ntoo no lawm puag saud.  Wb yuav mus nkaum hauv tus noog roov loj tshaj plaws cov plaub, wb thiaj yuav mus txog koj niam yau nawd.  Koj niam yau twb yuav mus yuav txiv.  Tsam wb mus tsis ncav nws, nws ho mus lawm laiv."

Thoob yej hais tias, "Aub!  Kuv niag loj ua luaj no, wb nkag mus hauv nws cov plauj ces nws kuj paub xwb los pov?"

Mos ntsuab thiaj hais tias, "Tsis ntshai!  Kuv ya ncig koj peb lwm xwb, ces koj me me li kuv lawm thiab.  Wb mus, nws nyaj yuav tsis hnov lawm."

Ces mos ntsuab txawm los ya ncig Thob Yej peb lwm tas nrho, Thoob Yej txawm me me li tus mos ntsuab lawm tiag.  Ces ob tug txawm maj mam nkag mus lauj.  Nkag nkag mus txog, niag mos ntsuab nkag mus xyuas ob tug nram hav no tas, mos ntsuab txawm hais rau Thoob Yej hais tias, "Aub!  Ob tug nram hav no, ntshai yuav ris tsis tau wb."

mos ntsuab ho rov nkag mus xyuas ib niag lau loj loj nyob pem toj me ntsis.  Mos ntsuab hais tias, "Aub!  Tus no mas ris taus wb ntag lov.  Wb yuav nkag mus nyob rau hauv nws qab txia.  Koj mas tsis txhob nti nawd!  yog koj nti mas ib ntsis khaus nws, nws yuav muab kaus ncauj los laum, sais wb mus tsis txog koj poj niam laiv."

Ces Thoob Yej nkawd mus nkaum hauv niag lau laus qab txia.  Tab kis os, qaib qua thawj tsig xwb, cov niag noog roov ya mus lauj.  Ces peb tug niag txawm ya vig vag lawm lauj.  Muaj ob tug niag, mas niam ya rwg ntxiaj rau ub rau no.  Niag laus laus uas nkawd nyob hauv qab txia mas naim ya tsis taus li lauj.  Ya tug niag yuav poob tsis poob, yuav poob tsis poob.  Ya tib tug niag tuag vias lawv qa bxwb.  lawv mus mus txog puag pem Huab Tais qaum ntuj ces niag hnub twb yuav ntseg lauj.  Luag twb tseev hynuv nyuj hnyuv twm tas lawm ntxov.  ces niag noog roov ya ya mus tsaws rau saum niag ntoo qhuav loj loj nram Xeev laus qab zog thiab ntag lauj.

Mos ntsuab txawm hais rau Thoob Yej hais tias, "Tus dej no ces yog tus lawv tseev hnyuv nyuj twm pem hauv ntag.  Cov noog roov no lawv yuav nyob qhov no tos.  Muaj tej yav hnyuv nyuj hnyuv twm uas lawv tseev lawv tsis yuav, lawv muab tso rau dej tshoob los, lawv mam li khaws noj xwb.  Ces wb nqes ntawm no."

Ces Thoob Yej thiab mos ntsuab nkawd txawm tawm plaws hauv niag lau noog roov qab txia, tib plhaw los rau hauv av lawm lauj.  Niag noog roov hais tias, "Ned!  Tos li kuv ya caum tsis tau neb, niam yuav hnyav kuv ua luaj no, yog ob tug me dev ntawd nev.  Nag hmo kuv twb suav zoo diam, yog vim nyob hauv kub qab txia lawm nev.  Txhob ua li ntawd es kuv tuaj taus, peb tuaj txog ntxov, ces peb yeej tau hnyuv nyuj hnyuv twm noj los mas.  Tiam sis yog kuv ya tsis taus es peb thiaj tuaj txog lig lig, peb thiaj tsis tau hnyuv nyuj hnyuv twm noj.  Ob tug me dev ntawd, lam txhob rawm khiav, peb muab faib kiag thiab tso mas.  Khuv xim hwv!"

Ces cov niag noog thiaj ya mus tsaws rau hauv hav dej mus khaws luag tej tog hnyuv uas luag tsi syuav lawd coj los noj.  Thoob Yej nkawd txawm mus lauj.  Mus mus txog puag pem hauv dej.  Luag mas niam tseev hnyuv nyuj hnyuv twm zom zaws, tseev qaib tseev npua cuag tus tsi li lauj.  Ces nkawd ntsia ntsia.  ib ntsis niag mos ntsuab txawm hais tias, "Thoob Yej, koj poj niam lawv tsev nyob tid ntag.  Lawv tuaj ce dej qhov no mus haus xwb."

Thoob Yej txawm hais rau niag mos ntsuab hais tias, "Mos ntsuab, koj yeej meem pab kuv.  Koj txhob tso kuv tseg nawd.  Kuv tau noj tau hau li cas mas kuv yeej yuav pub kom koj tau noj tau haus ib yam nkaus li kuv thiab."

Mob ntsuab teb tias, "Tiag.  Yog koj pub rau kuv noj kuv haus kom kuv tsis txhob tshaib plab no, kuv yeej pab koj thiab tiag."

Ces niag mos ntsuab niam zoo zoo siab.  Niag mos ntsuab niam pab pab Thoob Yej thiab lauj.  Mos ntsuab txamw hais tias, "Thoob Yej, koj mus nyob lawm pem hauv dej ped.  ib me ntsis koj yuav pom koj niam yau tus ntxhais qhe tuaj nqa dej mus rau koj niam yau thiab nws tus txiv thsiab haus nawd."

Ces Thoob Yej txawm mus nyob pem hauv dej tos.  Cas ib me ntsis xwb txawm pom ib tug ntxhais qhev nqa ib lub plhuaj taub dawb dawb zoo zoo nkauj tuaj tiag lauj.  Thoob Yej txawm khiav loo mus hais rau tus ntxhais tias, Me ntxhais, koj tuaj cug dej mus dab tsi?"

Tus ntxhais ntawd teb hais tias, "Kuv tuaj cug dej mus rau Xeev Laus ntxhais nkauj Ntxawm thiab nws tus txiv tshiab nkawd haus."

Thoob Yej hais tias, "Xeev Laus ntxhais nkauj Ntxawm nyob qhov twg?"

Tus ntxhais hais tias, "Nws nyob tom tsev.  Puag thaum ub, nws mus yuav txiv neeg ntiaj teb.  mas nws tus txiv mus ua rog lawm.  Nyiam no nws mus yuav ib tug txiv tshiab lawm.  Hnub no pleb haus dej haus cawv, es tus vauv tshiab yuav txais nws.  Ces kuv thiaj tuaj nqa dej mus rau tus vauv thiab Xeev Laus ntxhais nkauj Ntxawm nkawd haus."

Ces tus ntxhais txawm cug dej ntawm tus ciav.  Thoob Yej txawm muab nws ob ntiv nplhaib kub uas thaum ub nws muab rau nws niam yau coj tso plhuav rau tom tus ciav, dej muab kuav los nkag plaws rau hauv tus ntxhais lub niag plhuaj taub lawm.  Thoob Yej txawm hais rau tus ntxhais hais tias, "Me ntxhais, koj nqa must xog ntua, koj txawm hais rau Xeev Laus ntxhais nkauj Ntxawm hais tias kom nws tsis txhob rawm haus.  Nws ntxuav tes tso no nawd."

Thaum ntawd, Ntxawm mas niam nrog tus txiv tshiab sib qawg sib nwg xwb lauj.  Tus ntxhias qhev nqa loo plhuaj taub dej los txog ntua.  Tus ntxhais txawm hais tias, "Ntxawm, nyiam no, tod muaj ib tug niag Hmoob, nws hais tias kom kuv nqa plhuaj taub dej no los txog no ces, kom koj ntxuav tes tso, tsis txhob rawm haus no na."

ntxhawm teb hais tias, "Aws!  Ntxuav sis ntxuav los mas."

Ntxawm nyuam qhuav muab dej los laub kiag ntxuav tes xwb, ciav ob ntiv nplhaib kub uas thaum ub Thoob Yej muab rau Ntxawm coj, txawm nkag nplho Ntxawm ob tug ntiv tes thiab ntag lauj!  ntxawm cia li tib thawb tus txiv tshiab cem tias, "Koj cia li khiav mus!  Kuv tus txiv tuaj txog lawm.  Kuv tsis yuav koj!  Kuv yuav yuav kuv tus txiv qub, thiaj yog kuv tus nkauj txhav qaib nraug txhav noog."

Ces tus txiv tshiab txawm khiav lawm lauj.  ntxawm thiaj hais rau Xeev Laus hais tias, Niam thiab txiv laiv!  Nyiam no, kuv tus txiv qub tuaj txog lawm laiv.  Nej saib meb!  Ob ntiv nplhaib kub no yog kus tus txiv qub li.  Thaud kuv yuav los, kuv muab hle tseg rau niag pob ntsaum.  Nyiam no tus ntxhais no nws mus nqa dej los rau kuv haus.  Nws must xog tod, muaj ib tug Hmoob nyob tod.  Tus Hmoob ntawd tso ob ntiv nlphaib no rau pem hauv dej ntws los rau hauv tus ntxhais no lub plhuaj taub.  mas kuv muab los laub ntxuav kev tes.  ob ntiv nplhaib no cia li nkag kiag rau hauv kuv ob tug qub ntiv tes.  Thaum ub, kuv tus txiv yuav mus ua rog, nws muab ob ntiv nplhaib no rau kuv coj, nws hais tias nws txawm mus cuaj xyoo kaum xyoo lawm los yog ob ntiv nplhaib no tsi shle hlo ntawm kuv ob tug ntiv tes mas nws tseem muaj txoj sia nyob xwb.  Li ntawd, thaum kuv los lawm, ob ntiv nplhaib no tsis tau hle ntawm kuv ntiv tes.  Tiam sis yog kuv muab hle tseg rau lub pob ntsaum lawm xwb.  Nyiam no mas ntshai kuv yuav yuav kuv tus txiv qub xwb, nws thiaj li yog kuv tus nkauj txhav qaib nraug txhav noog tiag tiag.  Hos tus txiv tshiab no mas kuv tsis yuav lawm."

Xeev Laus txawm teb hais tias, "Aub!  Yog tias tus vauv qub tuaj txog, Ntxawm tsis yuav tus vauv tshiab no lawm, ces tus vauv tshiab rooj mov cia muab tshem tseg.  tus vauv qub tus txog niam txog txiv zoo heev lawm lauj."

Ces muabt tus vauv tshiab rooj mov tshem tseg.  Xeev Laus npaj neeg tshuab puab, ntaus nruas luaj kwb twg tuaj tos tus vauv qub lauj.  Ces tuaj tso tau Thoob Yej mus txog tom Xeev Laus tsev ov.  yawm txiv txuj ci hlob hlob lauj!  Yawm txiv txawm hais rau Thoob Yej hais tias, "Tseeb tseeb koj yog kuv tus me vauv ntxawg tiag tiag los?"

Thoob Yej teb hais tias, "Aub!  Txiv, kuv yog koj vauv tiag tiag ntag lauj."

Yawm txiv tias, "Aub!  Koj yog kuv vauv ntxawg tiag no, koj sim tua niag hauv roob tid kom ua liaj ia rau kuv saib saib."

Thoob Yej thiaj nta hlo phom los tib phom rau niag hauv roob ua nws ua kiag ib thaj liaj ci ntsa iab tiag lauj.

Yawm txiv tias, "Aub!  Yog kuv vauv ntxawg tiag.  Koj yog kuv vauv tiag no, koj sim rov tua kom ua hauv roob li qub saib?"

Thoob Yej nta hlo phom los tib phom rau, rov ua kiag ib lub hauv roob li qhov qub lawm thiab.

yawm txiv tias, "Aub!  Me vauv, koj yog kuv vauv tiag tiag luaj!  Ua li mas koj sim tua niag pob tsuas tid kom ua liaj ia teb chaws rau kuv saib saib.  yog koj tua tau, mas koj thiaj yog kuv vauv tiag."

Thoob Yej nta hlo phom los tib phom rau niag pob tsuas, ua niag pob tsuas tawg tas, ua kiag liaj ia teb chaws lawm thiab.

Yawm txiv ro vhais tias, "Aub!  Tus no mas yog kuv vauv ntxawg tiag lauj!  Koj yog kuv vauv ntxawg tiag no, koj sim rov tua kom zoo li qub saib."

Thoob Yej rov nta hlo phom los tib phom rau rov ua kiag tib lub pob tsuas dawb paug li qub lawm thiab lauj.  Xeev Laus rov qab hais dua hais tias, "Aub!  Tus no mas yog kuv tus vauv ntxawg tiag!  Cov nqaij cov cawv no, yog tus vauv nws tuaj txog, txawm muaj ib tug vauv tshiab yuav yuav kuv tus ntxawm, mas thiaj li tau npaj.  Tiam sis, nyiam no, txoj hmoov muaj.  Tus vauv nws ho tuaj txog kuv ua niam ua txiv tsev lawm.  mas txawm yuav ntxab ntxawm tej dej cawv thiab cov nqaij hno no los rau kuv tus vauv noj mas tsis phim lawm.  Tej no, cia muab rau me nyuam yaus thiab zej zog noj ua si xwb.  Tso rov npaj dua, mas thiaj yuav zoo."

Ces txawm muab tus vauv tshiab tsum nqaij hno no los rau cov me nyuam yaus zej zog noj ua si xwb.

Xeev Laus txawm hais rau Thoob Yej hais tias, "Aub!  Me vauv, nyiam no, koj yog kuv vauv tiag.  Koj yuav tsum mus rnhiav cuaj tug nyuj cuaj tug twm los tua rau kuv noj.  Koj pom xeeb yog kuv ib tug vauv tiag, nyiam noj koj tau kuv tnxhais nkauj ntxawm lawm."

Thoob Yej thiaj hais rau nws txiv tias, "Aws!  cia kuv mam nrhiav los tau kawg los mas, txiv."

Thoob Yej thiaj li nta hlo phom tua cuaj phom tau cuaj tug nyuj.  Rov tua cuaj phom tau cuaj tug twm.  Thoob Yej coj los khi tau tib niag tiaj lauj.  Xeev Laus thiaj hais tias, "Aub!  Tus no mas thiaj li yog kuv tus vauv tiag itag."

Ces Xeev Laus txawm hu laj mej pej xeem tuaj.  Txawm tuaj pab ua tau cuaj lub tsev hawm tshav (tsev tsam phooj).  Ib lub muaj cuaj dag lauj.  Xeev Laus txawm hais rau Thoob Yej tias, "Aub!  Nyiam no koj mas yog kuv vauv tiag lauj.  Tab sis koj sim nce kuv tus ncej huab qag no, mus tuaj puag saum qhov kawg tus ncej khaub lig saud, hu qhua noj mov saib puas tau?"

Ces Thoob yej tsis pom qab yuav ua cas.  Nws txawm quaj quaj xwb lauj.  Mos ntsuab txawm los hais rau Thoob Yej tias, "Koj tsis txhob ntshai.  Kuv mam li qhia koj tau xwb los mas."

Mos ntsuab los de zoj tau ib daim me nplooj hleb kauv zoo zoo rau Thoob Yej, mos ntsuab hais tias, "Koj nqa daim no mus.  Mas koj mus txog saud, koj yawm txiv yuav kom koj mus de daim niag nplooj lauj pwm saud tshuab no.  Daim niag nplooj lauj pwm saud dam tuab li ib niag dos loj diam.  mas koj yeej tshuab tsis nrov ib zaug li.  Kuv thiaj de daim me nplooj hleb no rau koj.  Koj nce koj yawm txiv tus ncej huab qag ntawd, mas koj tsis txhob tuav qhov twg kiag.  Txhob ntsia qhov twg kia gli.  Koj ntsia ntsoov taw nce hlawv hlo xwb ces yeej tau kiag xwb los mas.  Yog koj ntsia tim tej ntsia saud ntsia hauv, tuav ub tuav no mas koj poob nthav ntag laiv.  Thaum ntawd koj yawm txiv yeej muab koj los ua ntxuag cawv xwb ntag nawd!  Koj mloog mloog kuv hais, mas koj thiaj yuav yeej nawd!  Thaum koj nce mus txog saud, koj muab kiag ib daim nplooj hleb los npuav nkaus ntawm koj daim di ncauj.  Koj tshuab daim nplooj hleb, tshuab peb zag rau neej, peb zag rau dab.  Tab nrho mas koj nqes ceev ceev los ntag laiv.  Yog koj tseem nyob ntsev saud, mas ib ntsis cua tshuab, koj yeej poob xwb.  Thaum koj poob los txog, mas koj yawm txiv yeej muab koj ua ntxuag awv xwb xwb nawb.  Ces thaum ntawd koj yuav tsis tau koj poj niam, kuj yuav tsis tau koj niam hlob thiab."

Ces Thoob Yej nce nws txawm tsis ntsia qhov twg li lauj.  nws txawm ntsia ntsoov nws txhais taw.  Nws nce hlawv hlo nce hlawv hlo mus not plaws rau puag saum ob tug ncej khaub lig.  Ciav muaj ib tsob niag nplooj lauj pwm tiag.  Thoob Yej txawm de kiag tau ib daim niag nplooj lauj pwm tuab muaj ib dos, ua txuj muab npuav nkaus ntawm qhov ncauj xwb.  nws muab kiag daim nplooj hleb los tshuab kiag peb zag rau neej peb zag rau dab tag nrho xwb, Thoob Yej nqes ceev ceev ti nkaus hauv pem teb.  Tib pliag zoj, ntuj tsaus nicab teb tsaus nti.  Mas lawg poob luaj taub twg lauj.  Cua mas nplawm nplawm yawm txiv me ncej huab qag yuav vau li lauj, xa ua yawm txiv me maum kawm mas ntxhov niab rau qhov txhia chaw.  yawm txiv thiaj thov thov tias, "Aub!  Tsum lauj!  Me vauv lauj            Nyiam no, cuaj lub tsev hawm tshav neeg puv nkaus.  Kuv me ncej huab qag qaij tas.  Kuv mem maum kaum tsev nqeeb ntxhov tas lawm.  me vauv thov tso cia li lauj.  Koj mas thiaj yog tseem tseem kuv vauv tiag lauj."

Tsuas tias cuaj lub tsev hawm tshav mas qhua ntsawm nkaus hauv.  Cov qhua ntawd noj tau peb hnub peb hmos.  Lawv noj tas cuaj tug nyuj cuaj tug twm.  Dej cawv haus du lug.  Noj noj tas rooj tshoob ntawd.  Yawm txiv txawm muab tau yim tus nkauj thiab Ntxawm, ces yog cuaj leeg nkaus.  Nws muab lub vab tshaus hlau los kem nruab nrab, tso tas nrho cuaj leeg ntawd zaum ib leej rau hauv txaj.  Kom lawv muab ib leeg ib tug ntiv tes tshwm sab nraud rau Thoob Yej twv cov ntiv tes ntawd saib Thoob Yej poj niam tus yog tus twg.  yawm txiv hais tias, "Yog nws los tuav tau nws poj niam tus ntiv tes, mas nws yog kuv vauv.  Yog nws los tuav tsis tau, mas nws yog kuv ntxuag cawv xwb los mas."

Ces Thoob Yej quaj quaj lauj!  Niam mos ntsuab txawm los hais rau nws tias, "Koj tsis txhob ntshai.  Koj yuav quaj ua tus dab tsi?  Cia kuv mam li pab koj.  Kuv nkag peb lwm rau nraud, peb lwm rau hauv.  Yog tias kuv tsaws ntua tus twg mas koj tuav nkaus tus ntawd.  Koj thiaj yuav tua koj poj niam nawb!"

Ces Xeev Laus txawm hais tias, "Kuv me vauv!  Nws yog kuv vauv ntxawg tiag no, nws sim los tuav Ntxawm tus ntiv tes saib!"

Thoob Yej thiaj los sawv loo saib nraud xyuas cov ntiv tes, pom mos ntsuab ya loo peb lwm rau hauv peb lwm rau nraud.  Mos ntsuab tsaws ntua.  Thoob Yej tuav nkaus tus mos ntsuab tsaws.  Thoob Yej hais tias, "Ntxawm ces yog tus no ntag nawd."

Xeev Laus hais tias, "Aub!  tus no mas yog kuv tus vauv tiag lauj!  Kawg kuv twb muab lub vab tshaus los thiav nruab nrab lawm, nws tseem twv tau Ntxawm lawm thiab."

Ces ib ntsis tsaus ntuj.  Xeev Laus los pua tau lav tsuj lav npuag rau ntawm tag.  Xeev Laus hais rau cov qhev hais tias, Ib ntsis, kom kuv me vauv ntxawg los pw ntawm kuv lub lav tsuj lav npuag no nawb!"

Ces niag mos ntsuab txawm los hais rau Thoob Yej hais tias, "Thoob Yej ov!  Koj tsis txhob pw nawb!  Luag pua lav tsuj lav npuag li no sim koj.  Yog tias koj los pw mas luag yuav muab koj ua ntxuag cawv xwb xwb nawd!  Nyiam no mas lawv muab Ntxawm kaw rau saum nthab lawm.  Ntxawm txia ua ib tug niag nas kos.  Ntxawm twb kaws ib lub qhov nthab to lawm.  Ntxawm yuav dauv ib txog hlab tsuj hlab npuag ntawd ib me chim.  Ces koj pom Ntxhawm txoj hlab tsuj hlab npuag, mas koj sawv tsees mus tooj zog txoj hlab ntawd.  Koj mus nrog Ntxawm pw lawm saum nthab nawd.  Yog koj tsi sua li kuv hais, mas koj yawm txiv yeej yuav sawv los muab koj ua ntxuag cawv nawd."

Ces tsuas ntuj, Thoob Yej thiaj ua txuj los pw zoj ib me ntsis xwb.  Ciav tsw hiav ntxiag.  Ntsia, cas pom txoj hlab tsuj hiab npuag dauv los lawm tiag.  Thoob Yej thiaj sawv tsees mus tooj zog txoj hlab tsuj ntawd mus nrog Ntxawm pw dua saum nthab lawm ntag.

Ces ib chim ib tag hmo, yawm txiv taws teeb los saib.  Cas tsis pom Thoob Yej ntawm tag lawm.  Tag kis yawm txiv hais tias, "Aub!  Sim mus xyuas saib.  ntshai yog kuv vauv ntxawg tiag."

Yawm txiv thiaj mus xyuas.  Cas pom Thoob Yej nrog Ntxhawm pw saum nthab.  yawm txiv thiaj hais tias, "Aub!  Zaum no mas thija yog tseem tseem kuv vauv ntxawg tiag lauj.  Kuv txuj ci ces tas li no lawm.  Ho kom nws los pe dab pe qhua, saib kuv puas tau muab nws los ntxuag cawv.

Kom Thoob Yej los pe dab pe qhua.  Ces Thoob Yej tsis paub li lauj.  Thoob Yej quaj quaj.  Mos ntsuab txawm los hais tias, "Koj txhob ntshai.  Cia kuv mam qhia koj.  Luag hais tias kom koj mus peb dab pe qhua no.  Ces koj mus tsa hlo ob tug dauj nram qhov rooj tag.  Thiab koj mus lawm tom tog txuas, koj nqa rab khaub rhuab tod los tso rau tom hauv plag saum lub rooj xwb, ces yog lawm los mas."

Ces yawm txiv tias, "Vauv, los peb dab pe qhua saib."

Thoob Yej thiaj li mus tsa hlob ob rab me dauj nram qhov rooj tag.  Thiab nws mus loo rau tom tog txuas nqa hlo rab khaub rhuab tod coj los tso plhuav rau tom hauv plag saum lub rooj.

Ces Xeev Laus niam qhuas qhuas nws hais tias, "Aub!  Yog tseem tseem kuv vauv ntxawg tiag lauj!  Kuv txuj ci tsis muaj ntxiv lawm, Ntxawm thiab me vauv nawb, neb nyob peb hnub tso, neb mam mus tsev."

Ntxawm thiab Thoob Yej nkawd thiaj nyob tau peb hnub.  Yawm txiv tseem rov qab hais tias, "Neb tsis txhob rawm mus nawb, me vauv!  Koj los nyob deb thiab.  yog neb mus lawm, yuav tsis muaj neeg pab kuv lawm.  Ua li mas, me vauv, koj mus luaj thiab notv kom tag ib daim teb hav zoov laus rau kuv tso, Ntxawm neb mam li mus ov."

Thoob Yej thiaj li nyob.  nws mus luaj tag ib thaj teb hav zoov laus.  Thoob Yej rov los hais rau nws yawm txiv tias, "Aub!  Txiv lauj!  Kuv los tuaj lawm ntev.  Tseg niam hlob thiab txiv yawg nyob xwb.  ntev lawm.  Rawm rov mus xyuas vaj xyuas tsev thiab.  Ces cia Ntxawm wb mus lauj."

Yawm txiv teb tias, "Tsis tau!  Txhob rawm mus, me vauv.  Yog neb yuav mus mas hlawv teb tas tso, neb li mam mus."

Aub!  Nkawd rov nyob nyob tos teb qhua.  Ces yuav mus hlawv teb lauj.  Yawm txiv txawm hais tias, "Aub!  Zuam no mas yuav mus hlawv teb nawb!  Yuav cia tub mab tub qhe mus hlawv nram qab teb.  Hos kuv me vauv mas nws yuav mus pua chaw pw hauv plawv teb.  Yog tias hluav taws kub hau lawm, kuv hu, vauv tseem teb hauv plawv teb tuaj thiab no, mas thiaj yog kuv vauv.  Hos hluav taws kuv dhau tas, kuv hu, yog tsi steb lawm no, mas yog kuv ntxuag cawv."  Nws yawm txi vhais li ntawd.  Ces nws quaj quaj lauj!  Tsis pom qab yuav ua li cas.  Ntshai kawg tuag xwb. 

Mos ntsuab thiaj ya los hais rau Thoob Yej hais tias, "Koj tsis txhob quaj!  Cia kuv mam qhia koj.  Yog koj yawm txiv ua li ntawd no, ces koj mus txiav ob lub raj dej.  Koj nqa mus.  Koj muab ob lub raj dej ntawd mus nqa dej coj los tso ntawm koj ob sab.  Thaum hluav taws kub tuaj, mas ob lub raj dej ntawd yuav ua ob lub niag pas hawv nyob ntawm koj ob sab.  Hluav taws yuav tsi skub thiab twb tsis ntaiv koj.  Koj nco ntsoov qhov kuv hais."

Ces txog hnub hlawv ntag lauj!  Xeev Laus txawm hais tias, Kuv vauv ntxawg, koj mus pua chaw pw lawm hauv plawv teb.  Cia tub mab tus qhe mus hlawv nram qab tuaj nawb."

Ces Thoob Yej txawm mus txiav tsuag tsuag tau ob lub raj dej luaj caj npab, coj mus ntim tau ob nyuam raj dej.  Thoob Yej txawm mus pw hauv plawv teb lawm ntag.  Nws must xog, nws txawm muab ob lub raj dej tso rau ob sab, nws pw hauv nruab nrab ntag lauj.

Tub mab tub qhe hlawv nram qab tuaj.  Tsuas tais nplaim mas sib ntswg yos tuaj lawm ntag lauj!  Kub kub.  Hluav taws tuaj dhau tas.  Cav mas tsuas tias kub liab vog.  Tsab ntoos mas vau pig poog qhov txhia chaw.  Yawm txiv txawm cem hais tias, "Tus me dev ntawd, niam khav diam.  Zaum no, nws tseem tsis yog kuv ntxuag cawv thiab, mas ntshe!"

Yawm txiv cav hu tias, "Me vauv e!"

Thoob Yej teb tias, "Hwv!"

Yawm txiv niam qhuas qhuas tias, "Aub!  Yog kuv tus me vauv ntxawg tiag tiag li lauj!  Hluav taws twb npaum li no lawm, hu tseem teb thiab.  Yog vauv ntxawg lawm lov.  Me vauv aw!  Yog hluav taws dhau lawm no los mog."

Thoob Yej los los tim plawv teb los txog.  yawg txiv tias, "Me vauv, koj txawm maj mus tsev los, neb los nyob ob peb hnub tso, kom Ntxawm xaws ris xaws tsho rau koj tso.  Neb mus qaum ntuj mus, neb mus peb hnub xwb txog lawm.  Yog neb mus ntiaj teb mus mas neb yuav mus peb xyoos thiaj txog.  Ces neb ua ib siab mus qaum ntuj mus, tso neb thiaj yuav txog sai me ntsis nawb!"

Nkawd los nyob tau peb hnub.  Ntxawm xaws tau ris tsho, rhais tis rhais tw rau nkawd tas.  Nkawd thiaj ya tiaj lias los rau peb hnub.  Ntxawm thiab Thoob Yej nkawd thiaj los txog rau ntiaj teb, rov los nrog niam hlob ua neej nyob rau ntiaj teb.